Acts 14
Valunavasi Ilou Paulo Mixali Mixolu ne Ikonia
1No mine Paulo ilou Valunavasi mixali ne Ikonia, la mi'una no nano no anu tani sou lalotu noxi'a ta Iutaia loxo ane'i ilavusou i'oxo'oxonu utotomu xe misokou sou mia'aloxu vaikalau Lataua. La mia'aloxu laixe manina, la sou ta Iutaia ta piena xe ta mitema ane'i ane ta Iutaia uasi ta piena musuku mimuxamuxaxu tane'i noxou Iesu. 2Ia ta Iutaia ane imuxaxu tane'i uasi ne mi'una tane'i noxi'a ta mitema ane'i ane ta Iutaia uasi sou ilo'a la'iaxa'a mo opone'i masuai'a ta mitema ane'i ane mimuxaxu tamei noxou Iesu. 3 aLa ane'i ilou mixolu maxuveeni lai ne mo mivikala pekia'u sou Tila io ilou i'ume uasi. La Anu mulosi'a xavi sou mi'oxonu sosovo iouiou xe mii ane talavusou uasi. Anu mumaxau lexe a'alo sou alauna noxou ne anu maninasou. 4La ta mitema no nano no anu tuala tila ne mikalipala la'oluxa'a tamei. La'oluxa'a vile mivulu noxi'a ta Iutaia, xe la'oluxa'a vile mivulu noxi'a ta aposeli. 5 bXe no mine ta Iutaia ilo'a ta mitema ane'i ane ta Iutaia uasi miavuti, la mipita noxi'a ta kisikisi'a, sou lexe i'oxo masuane'i ta aposeli mo i'oxo lexe ive'a no anu kulu mo isoli. 6Ia ane'i ilou milavusou mii ane ta mitema mivikala lexe i'oxonu ne, la ane'i ilou mi'ume milai no tuala tila ta tamei ne Lisita xe ne Delube mo no tuala mose'i la no pa'upa'umolu ne no xalee lia tila ne Likaonia. 7La ane'i ilou misolo xaixai sou mia'aloxu a'alo laixe no tuatuala ane ne.Valunavasi Ilou Paulo Mia'alo ne Lisita Xe ne Delube
8Xe itema vile lai ne Lisita ne, no mine nenu mivo'onu mo la tava'u ne mukilikalu la umuamua'i uasi muxoxolusi. 9Anu muxolu sou mulomu no mine Paulo mua'alo. La Paulo mumatakisou xe mumaisou lexe anu mumuxaxu tanu sou lexe uxali laixe la, 10la sou mu'ava lexe, “Naavuti mo natulu.” Aloxo ne, la itema ne mupisikei sou mutulu la mumuamua'i a vile.11 cNo mine ane'i ta mitema ane mine'e mipita mimaisou mii ma'ia ane Paulo mu'oxo ne, la ane'i mi'ava no anu vaikala noxi'a Likaonia aloxo 'o, “Ta lataua mixali loxo ta mitema mo milu'e mixali noxinge 'o.” 12Ane'i mivikala aloxo ne la mimoxo'u Valunavasi lexe Seusu, xe Paulo mimoxo'u lexe Elumesi xo anu Paulo ne tila sou u'oxonu vaivaikala. 13La tani sou lalotu noxou lataua ilemo lexe Seusu ne mutulu se 'alai no aitengaxu vimelu sou tuala tila ne. La sou aili'i sou muno'a ta bulumakau ta mulu mose'i mo seseenu mose'i misakiinu tavalanu mune'enu no aitengaxu tuala tila xo anu ilo'a ta mitema ane mine'e mipita ne, imasaxa lexe i'iaiamai'a Paulo ilou Valunavasi no anu sou ilotu noxi'a. 14Ia no mine ta aposeli Paulo ilou Valunavasi milomusou mii ane ne, la ane'i mikakakanu tokolomoi'a, ia miiave miuna noxi'a ta mitema ane mine'e mipita ne, la mi'ava'ava aloxo 'o, 15 d “Ngingi ta mitema 'o, tava'u loxovaa la sou ngingi nge'oxo 'ilixo ano. Nexi kalumo ne nexi ta mitemasi aloxo ngingi ne. Ia nexi taa'aloxu a'alo laixe ulai noxinge lexe ngingi ngaxiu tumalinge no anu mimii vitavitanisi ane ngingi ngalotu no anu ne. Io ngaxiu ulai noxou Lataua anu mumauli mo mukoinu loxotolo mo lialia xe luaki ilou mimii mukalusi mo ta mimii ane muxolu no nano no anu. 16 eTatei la Lataua iou muvaxai'a ta mitema no xalexalee tuatuala no lia 'o sou mimulinu 'ilixo noxi'a vilevilesi. 17 fIa Anu mupala'alixu mii vile noxou. Anu mumaxa'u 'ilixo laixe sou mulosinge la'iua molu no loxotolo mulu'e noxinge, mo Anu mulosinge la'ilali temanu no anu voxovoxosou mo mulosinge la'ilali ta piena, la mu'oxonenge te'osa manina.” 18Ane'i ilou mivikala aloxo ne, ia ta mitema ne pekia'a sou i'oxo iaiama ne sia, la ane'i ilou mixamuli ialuxu manina mo mitalosi'a.
19 gKa sou, ta Iutaia mose'i me'a ne Antioki xe Ikonia mine'e, la milapunu xavutalai'a ta mitema ane mine'e mipita ne sou mivau Paulo no anu kulu, mukalu la milavelavenu milaixu no ale no anu vimelusou tuala tila ne la misuanu muai ne xo mikalavoi lexe anu musoli. 20Ia ta mitema noxou Iesu mipita mixaliliiou, la anu muavuti mutulu sou mulivu mu'unalai no tuala tila. No voxo ane vile, la anu ilou Valunavasi milutu sou milai ne Delube.
Ane'i La Ilivu Noxi'a Paulo Ilou Valunavasi
21Ane'i mia'aloxu a'alo laixe no tuala tila ne la ta mitema ta piena mixali ta mitema noxou Iesu. Io ane'i ilou milivu milai ne Lisita xe ne Ikonia mo ne Antioki, 22 hsou mi'oxo pekia'u opone'i ane'i ane ta mitema noxou Iesu, mo mipeletotosi'a sou lexe itulu pekia'a no anu muxamuxaxu tane'i ane ne la mivikalane'i aloxo 'o, “Nenge tamuamua'i no anu vote'i sou tu'utu'umaxu ta piena tei ka sou ta'una no anu saxisaxila'u noxou Lataua.” 23Mo ane'i misosovosi'a ta tatila noxi'a ta mitema ilotu noxou Iesu vilevilesi ne, mo ane'i ilou mipelemu sou mikilaka, sou mi'italone'i ane'i ane mimulaxu tane'i ne noxou Tila. 24Ioxe ili'i, la Paulo ilou Valunavasi mimuamua'i no nixi no anu xalee lia ne Pisitia, la mixali no anu xalee lia ne Pamfulia. 25Xe mia'aloxu vaikala noxou Lataua no tuala tila ne Peluxa, mukalu la milu'e no tuala tila ne Atalia.26 iAne'i ilou mitelo no lasipi ne Atalia, la milivu milai ne Antioki. Tuala tila ane ne tei la ane'i ilou mixolu no anu mo ta mitema noxou Lataua mi'italone'i milai no anu alauna noxou Lataua, sou lexe i'oxonu xaixaine anu a mikalusou mo a milivu mine'e ne. 27 jIo ane'i mixali lai ne, la mipitane'i ta mitema e ilotu noxou Iesu ne mukalusi, sou mia'aloi'axu mimii mukalusi ane Lataua mu'oxonu noxi'a, mo mukisinu aitenga noxi'a ta mitema ane'i ane ta Iutaia uasi sou ane'i mimuxaxu tane'i noxou. 28La ane'i ilo'a ta mitema noxou Iesu ne mixolu lai ne maxuveeni.
Copyright information for
ATA